Nuk priten më lojtarë të tjerë, ndërsa pas ndeshjeve europiane mund të ketë
Vetëm 10 ditë përpara ndeshjes europiane ekipi i Flamurtarit vijon përgatitjet, përgatitje të kryera kryesisht në ambientet e fushës së aneksit pranë stadiumit. Duke parë temperaturat e larta të ditëve të fundit, seancat stërvitore janë përqendruar kryesisht në orët e pasdites. Ndërkohë, ashtu siç kanë konfirmuar drejtuesit e ekipit, merkatoja e Flamurtarit tashmë për momentin mund të quhet e mbyllur, të paktën deri në përfundim të aventurës në Europë.
Kështu, mbërritjet e deritanishme janë katër lojtarë, ndërsa më pas do të shihet nëse do të jetë e nevojshme për të afruar lojtarë të tjerë për sezonin e ardhshëm futbollistik, që ashtu siç është konfirmuar, do të nisë për Flamurtarin më 16 gusht me Superkupën ndaj ekipit të Tiranës. Vëmendja është përqendruar te ndeshja mes e parë europiane, ku sot vlonjatët do të shohin se cili kundërshtar do të jetë mes Mothervellit dhe Lanellit.
Trajneri i Flamurtarit, Eqerem Memushi, ka pranuar se objektivat e ekipit që ai drejton do të jenë të njëjta, pavarësisht kundërshtarit që do të jetë përballë. Të paktën, ashtu siç dhe deklarojnë drejtuesit e ekipit, synimi do të jetë që ekipi të kalojë turin e dytë dhe më pas të shihet, kjo edhe në varësi të kundërshtarit që do të jetë më pas. Megjithatë, këto mbeten hipoteza, pasi synimi është tashmë turi i dytë i Ligës së Europës, ku vlonjatët kthehen pas shumë vitesh mungesë.
Drejtues të ekipit kanë pranuar se për momentin Flamurtari mund të quhet i kompletuar të paktën për ndeshjet e Europës, pasi në këto momente nuk mund të flitet më për merkato. Çdo lojtar që mund të mbërrijë në këto momente nuk do të arrijë të kapë formën e lojtarëve aktualë, sepse përgatitjet e ekipit kanë kohë që kanë nisur, duke filluar me përgatitjet në Ohër të Maqedonisë, pa harruar që edhe federimet janë mbyllur.
Lojtarët janë tashmë të gatshëm t’i përballojnë me sukses ndeshjet. Sipas Memushit, Flamurtari tashmë mund të luajë pa problem, ndërkohë që ka pranuar se është pa dyshim një sinjal i mirë që ndeshja e parë do të luhet në Vlorë, aty ku Flamurtari ka mundësi të regjistrojë një rezultat pozitiv për të pretenduar kualifikimin.
Vlonjatët, gati listën për Europën
Flamurtari nis plotësimin e dokumenteve për futbollistët dhe stafin që do të udhëtojë së bashku me ekipin për ndeshjen e datës 23 korrik, pavarësisht vendit ku do të luhet. Duket se vizat do të sigurohen në Ambasadën e Britanisë së Madhe, ndërkohë që konfirmohet se edhe një numër sportdashësish vlonjatë kërkojnë të udhëtojnë për të ndjekur ndeshjen e Flamurtarit. Kështu, duket se ekipi vlonjat nuk do të jetë i vetëm, por do të ketë edhe mbështetjen e tifozëve, pa llogaritur ata që janë në Britani.
burimi i marre nga sportishqiptar.com.al
Nessun commento:
Posta un commento