“S’kemi ç’të humbasim do të hidhemi në aventurë!”

Bakaj beson tek bluë: “Një gol i tyre? Nuk e mendojmë fare”
Dinamo sot, në ndeshjen ndaj Lahtit do të ketë vetëm një rezultat, i cili do ta kualifikonte. Pikërisht rezultati i pastër 3-0. Një rezultat sa i pamundur, aq edhe i mundur. Sipas Elis Bakajt, futbolli të lejon të bësh çfarëdolloj llogarish përpara çdo lloj ndeshjeje. Kështu, sipas tij, sot skuadra e Muçës do të futet në fushë me mendimin që të fitojë ndeshjen, madje të shënojë sa më shpejt.
- 1-4 në Finlandë, realisht a ka shanse kjo Dinamo që të kualifikohet?
- Sigurisht që kemi. Në fakt kur mendon rezultatin e parë, atë humbje 1-4 të duket sikur nuk ke qenë fare në fushë. Por, kur shikon ndeshjen realisht edhe ne na vjen shumë inat, pasi nuk është se ata bënë ndonjë lojë aq të shpejtë, apo aq të fortë dhe realisht unë nuk e di sesi mundëm që t’I pësonim ato gola. Por, megjithatë, unë mendoj se asgjë nuk është e pamundur dhe futbolli prandaj është një lojë shumë e bukur. Pikërisht sepse të dhuron shumë emocione.
- Sapo keni parë kasetën e ndeshjes së parë. Ç’farë nuk duhet të bëjë Dinamo nga ajo që ka gabuar në Finlandë?
- Sapo e pamë realisht në dvd dhe jemi çuditur. Kur je në fushë nuk mund ta vlerësosh dot nivelin e kundërshtarit. Por, kur e pamë në dvd u çuditëm që një skuadër si ajo të na mundë. Ne duhet dhe do të fitojmë në Tiranë.
- Duhet të shënoni tre gola, apo e keni harruar?
- Jo nuk e kemi harruar. Ne do të kërkojmë që të shënojmë gol që në fillim dhe do ta kërkojmë golin. Pikërisht për këtë arsye skuadra do të dalë në fushë me mendimin për të shënuar, sepse vetëm kështu ne mund të arrijmë të shënojmë aq gola sa na duhen.
- Do të thotë kjo se do të hidheni në aventurë?
- Ne nuk kemi se çfarë të humbasim. Po, nëse është nevoja do të hidhemi edhe në aventurë.
- Ata mund të shënojnë?
- Këtë nuk e kemi menduar dhe s’do ta mendomë as në fushë.
burimi i marre nga sportekspres.com